ચાલુ વર્ષ 2024માં દેશમાં લોકસભાની ચૂંટણી યોજાવાની છે. તેના પડઘમ સંભળાવા લાગ્યા છે. બોર્ડ એક્ઝામ બાદ ગમે ત્યારે ચૂંટણીની તારીખો જાહેર થઈ શકે છે ત્યારે હવે ધીમે ધીમે તમામ રાજકીય પક્ષો ઉમેદવારોના નામ ફાઈનલ કરવામાં વ્યસ્ત થઈ ગયા છે.
2024 લોકસભાની ચૂંટણીને ધ્યાનમાં રાખી સત્તાધારી પક્ષ ભાજપની સામે તમામ વિપક્ષે એકજૂટ થઈ I.N.D.I.A. મહાગઠબંધન બનાવ્યું હતું અને એવું લાગી રહ્યું હતું કે, લોકસભાની ચૂંટણીમાં આ મહાગઠબંધન એકજૂટ થઈ ભાજપ સામે ચૂંટણી લડશે, પરંતુ જેમ જેમ ચૂંટણી નજીક આવી રહી છે, ચિત્ર બદલાઈ રહ્યું છે. ધીમે ધીમે એક બાદ એક રાજકીય પક્ષો મહાગઠબંધનથી છેડો ફાડી રહ્યાં છે, તો બીજી તરફ રાજકીય પક્ષો લોકસભાની ચૂંટણીને ધ્યાનમાં રાખી સ્વતંત્રપણે ઉમેદવારોના નામ જાહેર કરી રહ્યાં છે.
ગુજરાતમાં ભારત ગઠબંધનને એક પ્રકારનો ફટકો આપતા આમ આદમી પાર્ટીએ તેના બે ઉમેદવારોના નામ ફાઈનલ કરી દીધા છે. આમ આદમી પાર્ટીના સાંસદ સંદીપ પાઠકે કહ્યું કે અમે ગુજરાતના ભરૂચથી ચૈતર વસાવા અને ભાવનગરથી ઉમેશ ભાઈ મકવાણાને ઉમેદવાર જાહેર કરી રહ્યા છીએ.
આમ આદમી પાર્ટીના સાંસદ સંદીપ પાઠકે વધુમાં જણાવ્યું હતું કે ગુજરાતમાં મહાગઠબંધનમાં અમારી પાસે 8 બેઠકો છે. અમને લાગે છે કે કોંગ્રેસ અમને ટેકો આપશે. તેમણે છેલ્લા એક મહિનામાં ભારત ગઠબંધનની એક પણ બેઠક ન મળવા પર નારાજગી વ્યક્ત કરી છે.
આ સાથે જ સંદીપ પાઠકે વધુમાં કોંગ્રેસ પર પ્રહાર કરતાં કહ્યું કે અમે બે વખત કોંગ્રેસ સાથે મુલાકાત કરી પરંતુ તેમાંથી કંઈ બહાર આવ્યું નથી. વળી છેલ્લા એક મહિનામાં એક પણ બેઠક થઈ નથી. પહેલા ન્યાય યાત્રાનું કારણ આપવામાં આવ્યું અને પછી કંઈ કહેવામાં આવ્યું નહીં. આ બેઠક ક્યારે થશે તે અંગે કોંગ્રેસના કોઈપણ નેતાને ખ્યાલ નથી. આજે મારે ભારે હૃદયે આ કહેવું પડી રહ્યું છે.
