પંજાબના શેર સામે ગુજરાતના સાવજ હાર્યા, શશાંકસિંહ મેચનો હીરો, 61 રન ફટકાર્યા

ઇન્ડિયન પ્રીમિયર લીગ (IPL)ની 17મી સિઝનની મેચ નંબર-17માં ગુજરાત ટાઇટન્સનો સામનો પંજાબ કિંગ્સ (PBKS) સાથે થયો હતો. પંજાબે આ મેચ ત્રણ વિકેટથી જીતી લીધી હતી. પંજાબે 200 રનનો ટાર્ગેટ એક બોલ બાકી રાખીને હાંસલ કરી લીધો હતો. પંજાબની જીતના હીરો શશાંક સિંહ અને આશુતોષ સિંહ હતા, જેમણે ગુજરાતના હાથમાંથી મેચ છીનવી લીધી હતી. શશાંક સિંહ 29 બોલમાં 61 રન બનાવીને અણનમ રહ્યો હતો. જ્યારે આશુતોષ સિંહે 17 બોલમાં 31 રનની ઇનિંગ રમી હતી.

લક્ષ્યનો પીછો કરતી વખતે પંજાબ કિંગ્સની શરૂઆત ખરાબ રહી હતી અને માત્ર 13 રનમાં કેપ્ટન શિખર ધવનની વિકેટ ગુમાવી દીધી હતી. બીજા ઓપનર જોની બેયરસ્ટોએ કેટલાક સારા શોટ રમ્યા હતા, પરંતુ તે પોતાની ઇનિંગ્સને વધુ લાંબી કરી શક્યો નહોતો. પંજાબ કિંગ્સે ફરીથી સેમ કુરન, સિકંદર રઝા અને જીતેશની વિકેટ સસ્તામાં ગુમાવી દીધી હતી.

ટોસ હાર્યા બાદ પ્રથમ બેટિંગ કરતા ગુજરાત ટાઇટન્સે ચાર વિકેટે 199 રન બનાવ્યા હતા. ગુજરાત ટાઇટન્સ માટે કેપ્ટન શુભમન ગિલે 48 બોલમાં 89 રન બનાવ્યા જેમાં છ ચોગ્ગા અને ચાર છગ્ગાનો સમાવેશ થાય છે. જ્યારે સાઈ સુદર્શને 19 બોલમાં 33 રનની ઈનિંગ રમી હતી. કેન વિલિયમસન (26) અને રાહુલ તેવટિયા (અણનમ 23)એ પણ ગુજરાત માટે ઉપયોગી યોગદાન આપ્યું હતું. પંજાબ કિંગ્સ તરફથી કાગીસો રબાડાએ સૌથી વધુ બે વિકેટ ઝડપી હતી.

આઈપીએલ 2024માં સર્વોચ્ચ સ્કોર

• 89* શુભમન ગિલ વિરુદ્ધ પંજાબ કિંગ્સ અમદાવાદ
• 85 સુનીલ નારાયણ વિ દિલ્હી કેપિટલ્સ વિઝાગ
• 84* રિયાન પરાગ વિ દિલ્હી કેપિટલ્સ જયપુર
• 83* વિરાટ કોહલી વિરુદ્ધ કોલકાતા નાઈટ રાઈડર્સ બેંગલુરુ
• 82 સંજુ સેમસન વિ લખનૌ સુપર જાયન્ટ્સ જયપુર

આ મેચ માટે પંજાબ કિંગ્સ અને ગુજરાત ટાઇટન્સની પ્લેઇંગ-11માં મોટો ફેરફાર થયો છે. પંજાબ કિંગ્સના પ્લેઈંગ-11માં ઝિમ્બાબ્વેના ઓલરાઉન્ડર સિકંદર રઝાનો સમાવેશ કરવામાં આવ્યો છે. સિકંદર રઝાએ ઇંગ્લેન્ડના લિયામ લિવિંગસ્ટોનનું સ્થાન લીધું હતું, જે અગાઉની મેચ દરમિયાન ઇજાગ્રસ્ત થયો હતો. બીજી તરફ ગુજરાત ટાઇટન્સે ડેવિડ મિલરની જગ્યાએ કેન વિલિયમસનનો સમાવેશ કર્યો હતો. IPLમાં અત્યાર સુધીમાં ગુજરાત ટાઇટન્સ અને પંજાબ કિંગ્સ વચ્ચે ત્રણ મેચ રમાઈ છે. આ સમયગાળા દરમિયાન ગુજરાત ટાઇટન્સે બે મેચ જીતી છે અને પંજાબ કિંગ્સે એક મેચ જીતી છે. મોહાલી મેદાન પર છેલ્લી વખતે બંને ટીમો સામસામે આવી હતી, જેમાં ગુજરાત ટાઇટન્સનો છ વિકેટે વિજય થયો હતો.