ચૂંટણીમાં હારતાં કોંગ્રેસે જીતુ પટવારીને બનાવ્યાં MP કોંગ્રેસ અધ્યક્ષ
કોંગ્રેસના હાઈકમાન્ડે મધ્યપ્રદેશમાં હવે જીતુ પટવારીને પ્રદેશ અધ્યક્ષ બનાવ્યા છે,ઉમંગ સિંગરને વિપક્ષના નેતા અને હેમંત કટારેને વિપક્ષના ઉપનેતા બનાવવામાં આવ્યા છે
![](http://transparencynews.in/wp-content/uploads/2023/12/MP-CONGRESS-780x450.jpg)
- મધ્યપ્રદેશ કોંગ્રેસમાં મોટો ફેરફાર થયો છે
- મધ્યપ્રદેશમાં કોંગ્રેસ અધ્યક્ષ જીતુ પટવારીને બનાવવામાં આવ્યા
- ઉમંગ સિંગરને વિપક્ષના નેતા બનાવવામાં આવ્યા
મધ્યપ્રદેશ કોંગ્રેસમાં મોટો ફેરફાર થયો છે. ચૂંટણીમાં હાર બાદ કમલનાથે રાજીનામું આપી દીધું છે. કોંગ્રેસના હાઈકમાન્ડે હવે જીતુ પટવારીને પ્રદેશ અધ્યક્ષ બનાવ્યા છે. આ ઉપરાંત ઉમંગ સિંગરને વિપક્ષના નેતા અને હેમંત કટારેને વિપક્ષના ઉપનેતા બનાવવામાં આવ્યા છે.
મધ્યપ્રદેશમાં કોંગ્રેસની હાર માટે કોણ જવાબદાર ?
ગત સપ્તાહમાં પાર્ટી હાઈકમાન્ડ દ્વારા કમલનાથ પાસેથી રાજીનામું માંગવાના સમાચાર આવવા લાગ્યા હતા. અહેવાલો મુજબ હાઈકમાન્ડે કમલનાથને પાર્ટીના પ્રદેશ અધ્યક્ષ પદ છોડવા માટે કહ્યું હતું. તેનું કારણ એ હતું કે આ ચૂંટણીઓ દરમિયાન અને તેની પહેલા પણ પાર્ટી હાઈકમાન્ડે કમલનાથને સંપૂર્ણ છૂટ આપી દીધી હતી અને તેઓ પોતાની મરજી મુજબ નિર્ણયો લઈ રહ્યા હતા. જેથી આ હાર માટે કમલનાથને જવાબદાર ઠેરવીને તેમને પ્રદેશ અધ્યક્ષ પદેથી રાજીનામું અપાવ્યાનું કહેવામાં આવી રહ્યું છે.
કમલનાથે બેઠક પણ બોલાવી હતી
5 ડિસેમ્બરે એટલે કમલનાથે ભોપાલમાં પાર્ટીના તમામ ઉમેદવારોની બેઠક બોલાવી હતી. આ બેઠક સવારે 11 વાગ્યે પ્રદેશ કોંગ્રેસ કાર્યાલય ખાતે બોલાવવામાં આવી હતી. જેમાં પાર્ટીની આ કારમી હારની સમીક્ષા કરવામાં આવી અને દરેક સીટ પર હારના કારણોની ચર્ચા કરવામાં આવી હતી. પાર્ટીએ 2018ની વિધાનસભા ચૂંટણીમાં 114 ધારાસભ્યો ચૂંટ્યા હતા, પરંતુ આ વખતે આ સંખ્યા ઘટીને માત્ર 66 રહી છે.