![](http://transparencynews.in/wp-content/uploads/2024/03/ઈલેક્ટોરલ-બોન્ડ-780x470.webp)
સુપ્રીમ કોર્ટની કડક ઝાટકણી બાદ સ્ટેટ બેંક ઓફ ઈન્ડિયા (SBI)એ આખરે ગુરુવારે એટલે કે આજે ચૂંટણી પંચને ઇલેકટોરલ બોન્ડ વિશેની તમામ માહિતી સોંપી દીધી. આ ડેટામાં યુનિક નંબર પણ છે, જેનાથી એ જાણવાનું સરળ બનશે કે કોણે કયા રાજકીય પક્ષને ચૂંટણી દાન આપ્યું છે. RBIએ કમ્પ્લાયન્સ એફિડેવિટ પણ ફાઈલ કરી છે. એફિડેવિટના એક મુદ્દામાં એવું લખવામાં આવ્યું છે કે SBIએ આદરપૂર્વક તમામ વિગતો જાહેર કરી છે અને હવે (એકાઉન્ટ નંબર્સ અને KYC વિગતો) સિવાય અન્ય કોઈ માહિતી અટકાવવામાં આવી નથી. એવું માનવામાં આવે છે કે થોડા સમય બાદ ચૂંટણી પંચની વેબસાઈટ પર યુનિક નંબરની સાથે ઈલેક્ટોરલ બોન્ડની માહિતી પણ પ્રકાશિત કરવામાં આવશે.
સુપ્રીમ કોર્ટની કડક ઝાટકણી બાદ SBI લાઇન પર આવી
ડેડલાઇન પહેલાં જ આપી માહિતી
15 ફેબ્રુઆરીએ કોર્ટે ચૂંટણી બોન્ડ યોજનાને ગેરબંધારણીય ગણાવીને રદ કરી દીધી હતી. સોમવારે સુપ્રીમ કોર્ટમાં સુનાવણી દરમિયાન, CJI ચંદ્રચુડે કહ્યું હતું કે, એમાં કોઈ શંકા નથી કે SBIએ ખરીદેલા બોન્ડના આલ્ફાન્યૂમેરિક નંબર અને સીરીયલ નંબર, જો કોઈ હોય તો, સહિત તમામ ઉપલબ્ધ માહિતી પ્રદાન કરવી જરૂરી છે. તમને જણાવી દઈએ કે આલ્ફાન્યૂમેરિક કોડ દ્વારા જ બોન્ડ ખરીદનાર અને મેળવનાર રાજકીય પક્ષ વચ્ચેનો સંબંધ જાણી શકાશે.