સ્ટાર સ્પોર્ટ્સે ODI ટીમ ઓફ ધ યરની જાહેરાત કરી હતી. આખા વર્ષ દરમિયાન શાનદાર પ્રદર્શન કરનારા ખેલાડીઓને આ ટીમમાં સ્થાન આપવામાં આવ્યું છે.
- વર્ષ 2023 સમાપ્ત થાય તે પહેલા સ્ટાર સ્પોર્ટ્સે ODI ટીમ ઓફ ધ યરની જાહેરાત કરી.
- વર્ષ દરમિયાન શાનદાર પ્રદર્શન કરનારા ખેલાડીઓને સ્થાન આપવામાં આવ્યું.
- ODI ટીમ ઓફ ધ યર જોયા બાદ ભારતીય દિગ્ગજ અને ચાહકો ગુસ્સે થયા.
વર્ષ 2023 સમાપ્ત થઈ રહ્યું છે અને છેલ્લા 12 મહિનાઓમાં ક્રિકેટમાં શું થયું એ જોવાનો સારો સમય છે. વર્ષ 2023માં ઘણા ખેલાડીઓએ શાનદાર પ્રદર્શન કર્યું છે. આ સમયગાળા દરમિયાન ઓસ્ટ્રેલિયાએ છઠ્ઠી વખત ODI વર્લ્ડ કપનો ખિતાબ જીતવો એ ક્રિકેટ જગતની સૌથી મોટી ઘટનાઓમાંની એક હતી.
અમદાવાદના નરેન્દ્ર મોદી સ્ટેડિયમમાં ઓસ્ટ્રેલિયાએ ભારતને હરાવીને છઠ્ઠી વખત વર્લ્ડ કપનો ખિતાબ જીત્યો હતો. એવામાં 27 ડિસેમ્બરે સ્ટાર સ્પોર્ટ્સે ODI ટીમ ઓફ ધ યરની જાહેરાત કરી હતી. આખા વર્ષ દરમિયાન શાનદાર પ્રદર્શન કરનારા આ ખેલાડીઓને આ ટીમમાં સ્થાન આપવામાં આવ્યું છે. પરંતુ સ્ટાર સ્પોર્ટ્સની ODI ટીમ ઓફ ધ યર જોયા બાદ ભારતીય દિગ્ગજ અને ચાહકો ગુસ્સે થઈ ગયા. ઘણા ક્રિકેટ નિષ્ણાતો પણ ખૂબ નિરાશ દેખાતા હતા. આ સીરિઝમાં ભારતીય ટીમનો એક પૂર્વ ખેલાડી પણ ODI ટીમ ઓફ ધ યરથી ખુશ નહોતો અને તેને આ ટીમને મજાક ગણાવી હતી.
ODI ટીમ ઓફ ધ યર જોઈને ભારતીય દિગ્ગજ ગુસ્સે થઈ ગયા
સ્ટાર સ્પોર્ટ્સ દ્વારા જાહેર કરાયેલી ODI ટીમ ઓફ ધ યરમાં ટીમ ઈન્ડિયાના આઠ ખેલાડીઓને સ્થાન મળ્યું છે. રોહિત શર્મા, વિરાટ કોહલી, શુભમન ગિલ જેવા મહાન ખેલાડીઓ આ ટીમનો ભાગ છે. પરંતુ ICC ODI વર્લ્ડ કપ 2023નો ખિતાબ જીતનાર ઓસ્ટ્રેલિયાની ટીમમાંથી માત્ર એક ખેલાડીને ODI ટીમ ઓફ ધ યરમાં સામેલ કરવામાં આવ્યો છે. તેથી ભૂતપૂર્વ ભારતીય ખેલાડી રવિ શાસ્ત્રી આનાથી બિલકુલ ખુશ ન હતા અને રવિ શાસ્ત્રીએ આ ટીમને મજાક ગણાવી હતી.
એમને કહ્યું કે “આ ટીમની પસંદગી એક મજાક છે. રાશિદ ખાન… શું તે રમે છે? મને લાગે છે કે માત્ર ભારતીય ચાહકોએ જ મતદાનમાં ભાગ લીધો હતો. બીજા કોઈએ કર્યું નથી. મિશેલ માર્શ, રાશિદ ખાન, ક્વિન્ટન ડી કોક. વર્લ્ડ કપ વિજેતા ટીમમાંથી માત્ર એક જ ખેલાડી એડમ ઝમ્પા? શું રાશિદ નંબર 7 પરના શ્રેષ્ઠ ખેલાડીઓમાંથી એક છે? તેના માટે ત્યાં સ્થાન ન બનાવવું એ અવિશ્વસનીય છે. જાડેજા શ્રેષ્ઠ ઓલરાઉન્ડર છે. તે અને રાશિદ વિશ્વની તમામ સપાટી પર એક આદર્શ સંયોજન બની શક્યા હોત.
દક્ષિણ આફ્રિકાના ભૂતપૂર્વ ખેલાડીઓ પણ અસંમત હતા
માત્ર રવિ શાસ્ત્રી જ નહીં પરંતુ દક્ષિણ આફ્રિકાના ભૂતપૂર્વ ફાસ્ટ બોલર વર્નોન ફિલેન્ડર પણ વર્ષની આ ODI ટીમ સાથે અસંમત છે. તે માને છે કે ક્વિન્ટન ડી કોક અને ડેવિડ મિલર જેવા ખેલાડીઓ આ ટીમમાં હોવાના દાવેદાર હતા. પૂર્વ આફ્રિકન બોલરે કહ્યું, “જો હું ક્વિન્ટન ડી કોક હોત, તો હું પસંદગીમાં ચૂકી જવાથી ખૂબ જ નિરાશ થયો હોત. ODI ક્રિકેટમાં તેના છેલ્લા વર્ષ અને તેણે જે રીતે પ્રદર્શન કર્યું તે સાથે તે એક અદ્ભુત ખેલાડી છે. મને લાગે છે કે આ તમામ લોકો પસંદગી માટે લાયક છે. ખાસ કરીને ભારતીયો માટે તેમનું વર્ષ શાનદાર રહ્યું. વિરાટ સ્થિરતા લાવે છે. પરંતુ મારા માટે કદાચ એડન માર્કરામ, ડેવિડ મિલરનું બીજું નામ ગ્લેન મેક્સવેલ, તમે તેને કેવી રીતે છોડી શકો? તેણે ઓસ્ટ્રેલિયાને હારથી બચાવી હતી, પસંદ કરવા માટે ઘણા બધા લોકો છે. જો હું મેક્સવેલ હોત, તો મને પસંદગી વિશે નિરાશ થયો હોત.’
સ્ટાર સ્પોર્ટ્સે તેની ODI ટીમ ઓફ ધ યરમાં રોહિત શર્મા, શુભમન ગિલ, વિરાટ કોહલી, ડેરેલ મિશેલ, કેએલ રાહુલ, હેનરિક ક્લાસેન, એડમ ઝમ્પા, કુલદીપ યાદવ, મોહમ્મદ શમી, મોહમ્મદ સિરાજ અને જસપ્રિત બુમરાહનો સમાવેશ કર્યો છે.
