બિહાર ભાજપના દિગ્ગજ નેતા અને પૂર્વ ડે. સીએમ સુશીલકુમાર મોદીનું નિધન

બિહારના પૂર્વ નાયબ મુખ્યમંત્રી અને બિહાર ભાજપના દિગ્ગજ નેતા સુશીલકુમાર મોદીનું નિધન થયું છે. સુશીલ મોદી બિહારના રાજકારણમાં એક મોટું નામ હતું. ભાજપના નેતા સુશીલ મોદી ચારેય ગૃહો લોકસભા, રાજ્યસભા, વિધાનસભા અને વિધાન પરિષદના સભ્ય રહી ચૂક્યા છે. જોકે આ વર્ષે તેમને રાજ્યસભામાં મોકલવામાં આવ્યા ન હતા.

2005 થી 2013 સુધી બિહાર સરકારમાં નાયબ મુખ્ય પ્રધાન અને નાણાં પ્રધાન રહ્યા

તેઓ ભાગલપુરથી 2004ની લોકસભાની ચૂંટણી જીત્યા હતા પરંતુ બિહારમાં નીતિશ સાથે સરકાર બનાવ્યા પછી તેમણે સંસદમાંથી રાજીનામું આપી દીધું હતું અને પછી 2005 થી 2013 સુધી બિહાર સરકારમાં નાયબ મુખ્ય પ્રધાન અને નાણાં પ્રધાન રહ્યા. તે પછી જ્યારે નીતીશ RJD સાથે ગયા તો તેઓ વિધાન પરિષદમાં વિપક્ષના નેતા પણ બન્યા. તે પછી જ્યારે નીતીશ કુમાર NDAમાં પાછા ફર્યા તો તેઓ ફરી એકવાર ડેપ્યુટી CM બન્યા હતા.

જાહેર જીવનમાં છેલ્લો સંદેશ

સુશીલ કુમાર મોદીએ 3 એપ્રિલના રોજ જાહેર જીવન માટે પોતાનો છેલ્લો સંદેશ આપ્યો હતો. તેમણે સોશિયલ મીડિયા પર લખ્યું હતું. “હું છેલ્લા છ મહિનાથી કેન્સર સામે ઝઝૂમી રહ્યો છું. હવે મને લાગે છે કે લોકોને કહેવાનો સમય આવી ગયો છે કે હું લોકસભાની ચૂંટણીમાં કંઈ કરી શકીશ નહીં. મેં દેશના વડાપ્રધાનને બધુ કહી દીધું છે. , દેશ, બિહાર અને પાર્ટીનો સદાય આભારી અને હમેંશા સમર્પિત. આ લખ્યા બાદ સુશીલ મોદી જ્યારે બિહાર આવ્યા ત્યારે એરપોર્ટ પર તેમની હાલત જોઈને તેમના સમર્થકો ચોંકી ગયા હતા. તેનું શરીર સાવ લથડી ગયું હતું.. ત્યારપછી જ્યારે બીજેપીના ઘણા દિગ્ગજ નેતાઓ તેમને તેમના ઘરે મળવા આવ્યા તો તેમના પરિવારના સભ્યોએ તેમનો ફોટો લેવાની ના પાડી દીધી.

સુશીલ મોદી જેપી ચળવળના ત્રિમૂર્તિઓમાંના એક હતા

સુશીલ મોદી, નીતિશ કુમાર અને લાલુ પ્રસાદ જેપી ચળવળ પછી ઉભરી આવેલા ત્રિપુટી તરીકે જાણીતા હતા. સુશીલ મોદી શરૂઆતથી જ રાષ્ટ્રીય સ્વયંસેવક સંઘ સાથે જોડાયેલા હતા. 1971માં સુશીલ મોદીએ પોતાની રાજકીય કારકિર્દીની શરૂઆત વિદ્યાર્થી રાજનીતિથી કરી હતી. આ પછી, યુવા નેતા તરીકેની તેમની ઓળખ યુનિવર્સિટી દ્વારા રાજ્યના રાજકારણમાં પહોંચી. વર્ષ 1990માં સુશીલકુમાર મોદી વિધાનસભાની ચૂંટણી લડ્યા અને જીત્યા અને ધારાસભ્ય બન્યા. આ પછી બિહારની રાજનીતિમાં તેમનું કદ વધતું ગયું.