ડોલવણ તાલુકાની પદમડુંગરી પ્રાથમિક શાળામાં જિલ્લા વિકાસ અધિકારી રામનિવાસના માર્ગદર્શન અને DWDU પ્રોજેક્ટ ડાયરેક્ટર ખ્યાતિ પટેલના અધ્યક્ષસ્થાને પ્રધાનમંત્રી કૃષિ સિંચાઈ યોજના 2.0 અંતર્ગત વોટરશેડ યાત્રા કાર્યક્રમનું આયોજન કરવામાં આવ્યું હતું. આ કાર્યક્રમમાં જળસંચય, જળસંગ્રહ અને પર્યાવરણ સંરક્ષણ વિશે વિસ્તૃત માહિતી આપવામાં આવી હતી.
કાર્યક્રમ દરમિયાન ઉપસ્થિત સૌએ જમીન અને જળ સંરક્ષણની સામુહિક પ્રતિજ્ઞા લીધી. રથના માધ્યમથી ઉપસ્થિત નાગરિકોએ યોજનાની માહિતીસભર ફિલ્મ જોઈ હતી. સાથે પર્યાવરણ જાગૃતિ માટે આયોજિત ચિત્ર સ્પર્ધામાં ભાગ લેનાર વિદ્યાર્થીઓને પ્રમાણપત્ર આપી સન્માનિત કરવામાં આવ્યા હતા. તાપી જિલ્લાના જળસ્ત્રાવ વિકાસ એકમ દ્વારા આ કાર્યક્રમનું આયોજન કરવામાં આવ્યું હતું.
8 ગામોને લાભ, 1718 કામો માટે 12 કરોડ રૂપિયાની મંજૂરી
પદમડુંગરી પ્રોજેક્ટમાં કુલ આઠ ગામોનો સમાવેશ થાય છે. આ પ્રોજેક્ટ અંતર્ગત સરકાર દ્વારા કુલ 1718 કામો માટે રૂ. 12 કરોડની રકમ મંજૂર કરવામાં આવી છે. આ કામોમાં ચેકડેમ બનાવવા, તળાવ ઊંડા કરવા, ગેબિયન સ્ટ્રક્ચર જેવા કાર્યોનો સમાવેશ છે, જે દ્વારા ગામોમાં પાણીની અછતને નિવારી શકાશે.
લોકોની આજીવિકા માટે પ્રયાસો
આ યોજના દ્વારા લોકોની આજીવિકા માટે સખી મંડળોને રિવોલ્વિંગ ફંડ આપવામાં આવશે. વિવિધ સાધન સહાય જેવી કે મસાલા મિલ યુનિટ, મંડપ ડેકોરેશન, અથાણા પાપડ યુનિટ, કેટરિંગ કીટ જેવા સાધનો જરૂરિયાતમંદ પરિવારોને આપીને તેમની આર્થિક સ્થિતિમાં સુધારો કરવાના પ્રયાસો શરૂ કરવામાં આવ્યા છે.
આ પ્રોજેક્ટ દ્વારા ગ્રામીણ વિસ્તારોમાં પાણીની સમસ્યા દૂર કરવા સાથે સ્થાનિક લોકોની આર્થિક સ્થિતિમાં સુધારો લાવવાનો લક્ષ્યાંક છે.
