માંડવી તાલુકાના કાકરાપાર ગામે તાપી નદીના કિનારે થઈ રહેલી ગેરકાયદે રેતી ખનનની પ્રવૃત્તિ સામે સુરત ભુસ્તર વિભાગે મોટી કાર્યવાહી કરી છે. રોયલ્ટી ઇન્સ્પેક્ટરની ટીમે સરપ્રાઇઝ ચેકિંગ દરમિયાન બે JCB મશીનો અને એક ટ્રક જપ્ત કર્યા છે, જેની કુલ કિંમત રૂ. 50 લાખ જણાવવામાં આવી છે.
અધિકારીઓની ચેકિંગમાં ખુલ્લું પડ્યું ગેરકાયદે ખનન
ભુસ્તર વિભાગને મળેલી ગુપ્ત માહિતીના આધારે રોયલ્ટી ઇન્સ્પેક્ટરે કાકરાપાર ગામમાં ચેકિંગ કરી. તાપી નદીના કાંઠે પરમિટ વગર ચાલી રહેલી રેતી ખનનની પ્રવૃત્તિ દરમિયાન GJ-05-CE-8958 અને GJ-06-VV-9927 નંબરની બે JCB મશીનો તેમજ GJ-05-YY-6247 નંબરનો ટ્રક જપ્ત કરવામાં આવ્યા. આ ઉપરાંત, ખનન માટે જરૂરી કાગળોની ગેરહાજરીમાં કાયદેસર કાર્યવાહી કરવામાં આવી.
રેતી માફિયાઓમાં ફફડાટ, ટીમ આવતા જ ભાગી ગયા
અધિકારીઓની ટીમ જ્યારે સ્પોટ પર પહોંચી, ત્યારે ગેરકાયદે ખનનમાં લીન લોકો ભાગી છૂટ્યા. સ્થાનિક સ્ત્રોતોના મુતાબિક, આ વિસ્તારમાં લાંબા સમયથી રેતી માફિયાઓ દ્વારા અનધિકૃત ખનન ચાલી રહ્યું હતું, જેમાં અધિકારીઓ સાથે સાંઠગાંઠના આરોપો પણ ઊઠતા રહ્યા છે. આજની કાર્યવાહીથી ગેરકાયદે ખનન કરનારાઓમાં ફફડાટ ફેલાયો છે.
કાયદેસર કાર્યવાહી ચાલશે
ભુસ્તર વિભાગના અધિકારીઓએ જણાવ્યું છે કે જપ્ત કરેલા મશીનો અને ટ્રકની તપાસ કરીને કાયદેસર પગલાં લેવામાં આવશે. આ મામલે ગુનેગારો સામે કડક કાર્યવાહી કરવાની તૈયારી જાહેર કરવામાં આવી છે.
આજની આ કાર્યવાહીથી સરકાર દ્વારા ગેરકાયદે ખનન રોકવા માટે લેવાતા પગલાંની સ્પષ્ટતા થાય છે, પરંતુ સ્થાનિક લોકોનો આરોપ છે કે આવી પ્રવૃત્તિઓ રાજ્યના અન્ય વિસ્તારોમાં પણ ચાલી રહી છે, જેના સામે વધુ સખ્ત નિયંત્રણો જરૂરી છે.
