ડાંગના ચીરાપાડા ગામના શ્રમજીવી પરિવારના ભોવન રાઠોડની સિદ્ધિ

આહવા સહ્યાદ્રિ પર્વતમાળાના યુવાને હિમાલયન વેલીના સૌથી ઊંચા શિખર ‘માઉન્ટ એવરેસ્ટ’ને સર કરવાના જોયેલા સ્વપ્નને પૂર્ણ કરવાની દિશામાં વધુ એક ડગલું ભરતા ડાંગ સહિત રાજ્યના સાહસિક યુવાનોમાં વધુ એક આશાનું કિરણ જન્માવ્યું છે.

ડાંગ જિલ્લાના આહવા તાલુકાના ચીરાપાડા ગામના શ્રમજીવી પરિવારના ફરજંદ એવા પર્વતારોહક યુવાન ભોવન રાઠોડે તાજેતરમાં જ હિમાલય વેલીની KY1 તરીકે ઓળખાતા અને 6400 મીટર (21 હજાર ફૂટ)ની ઊંચાઈએ આવેલા માઉન્ટ ‘કાંગ યાત્સે’ શિખર ઉપર ભારતનો તિરંગો લહેરાવ્યો હતો. ટાટા સ્ટીલની સ્પોન્સરશીપના સથવારે ઉત્તર-પશ્ચિમ ભારતના લદાખ ક્ષેત્રમાં હિમાલયની ‘માર્ખા ઘાટી’માં આવેલા ‘હેમિસ નેશનલ પાર્ક’માં સમાવિસ્ટ માઉન્ટ ‘કાંગ યાત્સે’ કે જેની ઊંચાઈ 6400 મીટર (21 હજાર ફૂટ) છે ત્યાં પહોંચી ડાંગના ભોવન રાઠોડે ફરી એકવાર ‘માઉન્ટ એવરેસ્ટ’ ના બારણે ટકોરા માર્યા છે. ઉલ્લેખનીય છે કે માઉન્ટ એવરેસ્ટની ઊંચાઈ 8848.86 મીટર (29,032 ફૂટ) છે.

જ્યાં ભારતના સૌથી મોટા રાષ્ટ્રધ્વજને ફરકાવાની તેની ખ્વાહિશ છે. ડાંગ જિલ્લાના એકમેવ પર્વતારોહક તરીકે ડાંગ અને રાજ્યનું નામ રોશન કરનારા ભોવન રાઠોડે માઉન્ટ કાંગ યાત્સે’ સર કર્યા પછી જણાવ્યું હતું કે, KY1 માટે ટાટા સ્ટીલ દ્વારા ગુજરાતમાંથી એકમાત્ર તેની પસંદગી કરાતા, દેશના અન્ય પ્રદેશના 12 સાહસિક યુવાનોની ટીમ માઉન્ટ ‘કાંગ યાત્સે’ સર કરવા નીકળી હતી. વિષમ પરિસ્થિતિમાં ઓક્સિજનની કમી વચ્ચે અનુક્રમે 12 અને 15 હજાર ફૂટની ઊંચાઈએ તેમની ટીમના ત્રણ યુવાનની હાલત કથળતા તેમને રેસ્ક્યુ કરી હોસ્પિટલ ભેગા કરાયા હતા. બાદમાં બાકીના પર્વતારોહકોએ તેમની સફર આગળ વધારી હતી.

લક્ષીત શિખરની નજીક સીધા ચઢાણ ઉપર હાડ ગાળી નાખતી ઠંડીમાં ઓછા ઓક્સિજનને કારણે ટીમના બીજા ચાર યુવાનોએ બેઝ કેમ્પ પરત ફરવું પડ્યું હતું. બાકીના 5 યુવાનો જેમાં હિમાચલ પ્રદેશના 2, કેરાલાના 2 અને ગુજરાતના એકમાત્ર તેણે જબરદસ્ત ક્ષમતા અને આત્મવિશ્વાસ સાથે 8મી સપ્ટેમ્બર 2023ના રોજ અડધી રાત્રે અઢી વાગ્યે માઇનસ શૂન્યથી નીચેના તાપમાને કે જ્યારે બર્ફીલા ગ્લેશિયર કઠણ થઈ જાય છે તેવા અનુકૂળ સમયે લક્ષ નિર્ધાર સાથે અને ગ્લેશિયર પીગળવાનું શરૂ થાય તે પહેલા 8:25 વાગ્યે KY1 ના ફલક ઉપર ભારતનો રાષ્ટ્રધ્વજ લહેરાવી ડાંગનું નામ ફરી એકવાર સ્વર્ણાક્ષરે અંકિત કર્યું હતું. એવરેસ્ટ બેઝ કેમ્પ સુધી પહોંચી ગયો હતો તેણે માઉન્ટ એવરેસ્ટ સર કરવાના સ્વપ્નની પૂર્તિ માટે પ્રથમ ગુજરાત અને રાજસ્થાનની સરહદે આવેલી અરવલ્લીની પર્વતમાળાના શિખરે આવેલા માઉન્ટ આબુથી તેની માઉન્ટ એવરેસ્ટની સફરનો પ્રારંભ કરવાનું નક્કી કર્યું અને ગુજરાત સરકારના યુવક સેવા અને સાંસ્કૃતિક પ્રવૃતિઓના વિભાગ હસ્તકની સ્વામી વિવેકાનંદ પર્વતારોહણ તાલીમ સંસ્થા, માઉન્ટ આબુ (રાજસ્થાન)માં ઉપલબ્ધ એડવેન્ચર, બેઝિક, એડવાન્સ, કોચિંગ અને રોક કલાઈંબિંગ કોર્સમાં ભાગ લઈ જૂન 2022ના અંતે એવરેસ્ટ બેઝ કેમ્પ સુધી પહોંચી ગયો હતો. જ્યાંથી પરત આવ્યા બાદ ટાટા સ્ટીલ દ્વારા તેની KY1 માટે પસંદગી થતા તે ફરી બર્ફીલા પહાડોની ગોદમાં પહોંચી ગયો હતો.