કામરેજનાં નવી પારડી ગ્રામપંચાયતમાં તલાટી તરીકે ફરજ બજાવતા સોનલબેન દેસાઈને LCBની ટીમે મિલકતમાં નામ કમી કરાવવાનાં મામલે 9 હજારની લાંચ લેતાં આબાદ ઝડપી પાડી

પ્રાપ્ત માહિતી અનુસાર સોનલબેન શંભુભાઇ દેસાઇ કામરેજનાં નવી પારડી ગ્રામપંચાયતમાં તલાટી તરીકે ફરજ બજાવે છે. ત્યારે નવી પારડી પંચાયત કચેરી ખાતે ફરિયાદીની વડીલોપાર્જીત મિલકતમાં પોતાનાં સીધી લીટીનાં વારસદારોનાં નામો ચાલી આવતા હતા. જે પૈકી ફરિયાદીની સાસુ અને બે નણંદનાં નામો કમી કરાવવા માટે સોગંદનામું આપવામાં આવ્યું હતું. ત્યાર બાદ આગળની કાર્યવાહી માટે તલાટીનો સંપર્ક કરતાં તલાટી સોનલબેને ફરિયાદીને જણાવ્યું હતું કે, તમારે મિલકતમાં નામ કમી કરાવવા માટે 9 હજાર રૂપિયા આપો તો તમારૂં કામ થઇ જશે. એવું જણાવી 9 હજાર રૂપિયાની લાંચ માગી હતી.

જોકે ફરિયાદી લાંચ આપવા ન માંગતો હોવાનાં પગલે જેણે એસીબીનો સંપર્ક કરી સમગ્ર ઘટના અંગેની કેફિયત એસીબી સમક્ષ રજૂ કરી હતી. ઘટનાની જાણ થતાં એસીબીની ટીમે નવીપારડી પંચાયત કચેરી ખાતે છટકુ ગોઠવી દીધું હતું. જોકે ACBની ગોઠવેલી ટ્રેપ સફળ થઇ હોય તેમ તલાટી 9 હજારની લાંચ લેતા ઝડપાઇ ગયા હતા. હાલ એસીબીની ટીમે તલાટી સોનલબેન દેસાઇને ડિટેઇન કરી આગળની દિશામાં તપાસ હાથ ધરી હોવાનું સુત્રો દ્વારા જાણવા મળ્યું હતું.