ડાંગ જિલ્લો એ જંગલથી ઘેરાયેલ વિસ્તાર છે ત્યારે ડાંગ જિલ્લાનાં અમુક ગામોને ઇકો સેન્સેટીવ ઝોન તરીકે જાહેર કરી દેવાયો છે, તેવામાં જાહેર કરેલ આ ઇકો સેન્સેટીવ ઝોનમાં લોકોને ફાયદા કરતા વધુ નુકસાન થાય તેની શક્યતા જોવા મળી રહે છે તેવા આક્ષેપ સાથે પૂર્વ ધારાસભ્ય અને હાલમાં ડાંગ જિલ્લા ભાજપાના કદાવર નેતા મંગળભાઈ ગાવિતે વિરોધ નોંધાવ્યો હતો. ડાંગ જિલ્લો એ જંગલ વિસ્તાર અને પ્રકૃતિક સૌંદર્ય માટે જાણીતો છે. ડાંગ જિલ્લામાં 80 % વન વિસ્તારમાં 64 ગામને ઇકો સેન્સેટીવ ઝોન તરીકે જાહેર કરી દેવાયો છે.
જેને લઈને પંથકમાં અનેક તર્કવિતર્કો સર્જાઇ રહ્યાં છે. હાલમાં ફોરેસ્ટ રક્ષિત જંગલો છે, તેમાંથી રેતી, વૃક્ષ, પથ્થર કે અન્ય કોઈપણ ઉપજ લેવી હોય તો તે માટે હવેથી કેન્દ્ર સરકાર પાસેથી પરવાનગી લેવી પડશે એવી જોગવાઈ ઇકો સેન્સેટીવ ઝોન માટે કરાઇ છે. આ પ્રક્રિયાથી લોકોને હેરાનગતિ થાય તેમ છે. સરકાર દ્વારા ઇકો સેન્સેટીવ ઝોન અંગે ઠરાવ કરાયો છે. જેથી ડાંગ જિલ્લાનાં 64 ગામના લોકો ભયભીત થઈ રહ્યા છે.
આ પરિવર્તનથી તેમને લાભ થશે કે ગેરલાભ થશે તે પ્રશ્ન તમામ ગ્રામજનોને સતાવી રહ્યો છે ત્યારે આ મામલે પૂર્વ ધારાસભ્ય મંગળભાઈ ગાવિતે જણાવ્યું હતું કે, સરકાર દ્વારા ઇકો સેન્સેટીવ ઝોન અંગે ઠરાવ કરાયો છે ત્યારે તેમાં જોગવાઈ કરી છે કે ફોરેસ્ટ રક્ષિત જંગલો છે. તેમાંથી રેતી, વૃક્ષ, પથ્થર કે અન્ય કોઈપણ ઉપજ લેવી હોય તો તે માટે હવેથી કેન્દ્ર સરકાર પાસેથી પરવાનગી લેવી પડશે.
જોકે આ પ્રકારની પ્રક્રિયાથી આદિવાસી લોકોએ પરેશાન થવું પડે તેમ છે તેમજ ઇકો સેન્સેટીવ ઝોનમાં ડીજેનો કે એવો અન્ય કોઈ પણ ઘોંઘાટ કરી શકાય નહીં તો નવરાત્રિ દરમિયાન ડીજેના તાલે ખેલૈયા કઈ રીતે ઝુમશે તેમજ સરકાર દ્વારા ઇન્દિરા આવાસ, પ્રધાનમંત્રી આવાસ,બોર્ડર વિલેજ આવાસ વગેરે યોજના હેઠળ આવાસ અપાય છે, જેમાં 1.20 લાખની રકમ આવાસ હેઠળ સરકાર ચૂકવે છે. અત્રે ઉલ્લેખનીય છે કે, ભાજપના પૂર્વ જિલ્લા પંચાયત પ્રમુખ અને ધારાસભ્ય એવા મંગળ ગાંવિતની આ જાહેરાતથી ડાંગ જિલ્લાના રાજકારણમાં ફરી ખળભળાટ મચી ગયો છે.
જરૂર પડ્યે આંદોલનની પણ ચીમકી
અન્ય જિલ્લામાંથી રેતી કઈ રીતે મંગાવવી અને કઈ રીતે આવાસ બનાવવું તે પણ પ્રશ્ન ઉદ્ભવે તેમ છે. જેથી તમામ ગ્રામજનો આ ઇકો સેન્સેટીવ ઝોનને લઈને વિરોધ નોંધાવી રહ્યાં છે. આ ઇકો સેન્સેટીવ ઝોનનો ઠરાવ રદ કરાવામાં આવે તેવી માંગ કરી છે. આ સાથે જરૂર પડે તો આંદોલનની ચીમકી પણ ઉચ્ચારી છે.
