દુબઈ ઈન્ટરનેશનલ ક્રિકેટ સ્ટેડિયમમાં આજે ભારતીય ટીમે ન્યૂઝીલેન્ડને 44 રનથી હરાવીને ICC ચેમ્પિયન્સ ટ્રોફી 2025માં શાનદાર જીત નોંધાવી છે. આ મેચમાં ભારતીય ટીમે બેટિંગ અને બોલિંગ બંને ક્ષેત્રે શ્રેષ્ઠ પ્રદર્શન કર્યું હતું.
મેચ સારાંશ
ટૉસ હારીને પહેલા બેટિંગ કરતા ભારતીય ટીમે 50 ઓવરમાં 9 વિકેટના નુકસાન પર 249 રન બનાવ્યા હતા. જવાબમાં ન્યૂઝીલેન્ડની ટીમ 45.3 ઓવરમાં માત્ર 205 રન બનાવી ઓલ આઉટ થઈ ગઈ. ભારતીય ટીમે ન્યૂઝીલેન્ડને 250 રનનો ટાર્ગેટ આપ્યો હતો, પરંતુ ન્યૂઝીલેન્ડની ટીમ આ ટાર્ગેટ પાર કરવામાં નિષ્ફળ રહી.
ભારતની બેટિંગ
ભારતના ટોપ-ઓર્ડર બેટ્સમેનો રોહિત શર્મા (15 રન), શુભમન ગીલ (2 રન) અને વિરાટ કોહલી (11 રન) ઝડપથી આઉટ થયા હોવા છતાં, શ્રેયસ ઐય્યરે 98 બોલમાં 79 રનની શાનદાર પારી ખેડી. તેમણે બે સિક્સ અને ચાર ફોર ફટકાર્યા હતા. હાર્દિક પંડ્યાએ 45 બોલમાં 45 રન અને અક્ષર પટેલે 61 બોલમાં 42 રનનો ફાળો આપ્યો.
ભારતની બોલિંગ
ભારતીય બોલિંગમાં વરુણ ચક્રવર્તીએ ન્યૂઝીલેન્ડના પાંચ બેટ્સમેનોને આઉટ કરી કમાલ કરી બતાવી. કુલદીપ યાદવે બે વિકેટ લીધી, જ્યારે હાર્દિક પંડ્યા, અક્ષર પટેલ અને રવિન્દ્ર જાડેજાએ એક-એક વિકેટ ઝડપી.
ન્યૂઝીલેન્ડની બેટિંગ
ન્યૂઝીલેન્ડ તરફથી કેન વિલિયમસે 120 બોલમાં 81 રનની શ્રેષ્ઠ પારી ખેડી, પરંતુ તેમના સિવાય કોઈ પણ બેટ્સમેન મોટો ફાળો આપી શક્યો નહીં. વિલ યોંગે 22 રન અને સુકાની મિશેલ સન્ટનરે 28 રન બનાવ્યા, પરંતુ ટીમ 205 રન પર ઓલ આઉટ થઈ ગઈ.
સેમિફાઈનલની તૈયારી
આ મેચમાં જીત મેળવીને ભારતીય ટીમ સેમિફાઈનલમાં પ્રવેશી ચૂકી છે. ભારતનો સામનો 4 માર્ચે દુબઈમાં ઓસ્ટ્રેલિયા સાથે થશે. જ્યારે ન્યૂઝીલેન્ડ સેમિફાઈનલમાં સાઉથ આફ્રિકાનો સામનો કરશે.
પોઈન્ટ ટેબલ
ગ્રૂપ-એ: ભારતે ત્રણ મેચમાંથી ત્રણેય મેચ જીતી 6 પોઈન્ટ સાથે ટોચ પર છે. ન્યૂઝીલેન્ડ બીજા, બાંગ્લાદેશ ત્રીજા અને પાકિસ્તાન ચોથા સ્થાને છે.
ગ્રૂપ-બી: સાઉથ આફ્રિકા પાંચ પોઈન્ટ સાથે ટોચ પર છે. ઓસ્ટ્રેલિયા બીજા, અફઘાનિસ્તાન ત્રીજા અને ઈંગ્લેન્ડ ચોથા સ્થાને છે.
આગામી સેમિફાઈનલ મેચોમાં ભારત અને ન્યૂઝીલેન્ડ બંને ટીમો પોતાના પ્રદર્શનમાં સુધારો કરીને ફાઈનલમાં પ્રવેશ મેળવવાનો પ્રયત્ન કરશે.
