તાપી જિલ્લાના નિઝર તાલુકાના મુખ્ય મથક નિઝર ગામના સંગીતા નગર ફળિયામાં ગટર લાઇન ઉભરાતા ગંદા પાણીની વહેંચણીથી સ્થાનિક લોકો પરેશાનીમાં આવી પડ્યા છે. ગટર લાઇનમાંથી ઉભરાતા દુર્ગંધયુક્ત પાણીના કારણે આસપાસનું વાતાવરણ દૂષિત બન્યું છે, જ્યારે સ્થાનિક પ્રશાસન અને ગ્રામ પંચાયતના અધિકારીઓ આ મુદ્દા પ્રત્યે ઉદાસીન જણાય છે.
ગંદકી અને મચ્છરોનો ઉપદ્રવ
સંગીતા નગર ફળિયામાં રહેતા નાગરિકોએ જણાવ્યું છે કે, સરકાર દ્વારા લાખો રૂપિયા ખર્ચીને બનાવવામાં આવેલી પાકી ગટર લાઇન છેલ્લા કેટલાક સમયથી ઊભરાવા લાગી છે. પરિણામે, ફળિયામાં ખુલ્લામાં ગંદું પાણી વહેતું હોવાથી નાક ફાડી નાખે એવી દુર્ગંધ ફેલાઈ રહી છે. આ ગંદકીના કારણે મચ્છરોનો ઉપદ્રવ વધી ગયો છે, જે લોકોના આરોગ્ય માટે ગંભીર જોખમ ઊભું કરી રહ્યો છે.
રોગચાળાની શંકા, પ્રશાસન બેદરકાર
સ્થાનિક લોકો ચેતવણી આપે છે કે, જો આવી ગંદકી અટકાવવામાં નહીં આવે, તો ભવિષ્યમાં મહામારી ફાટી નીકળવાનો ડર છે. નિઝર ગામના રહીશો અને આસપાસથી પસાર થતા લોકોએ આ સ્થિતિ પ્રત્યે તાલુકા પંચાયત અને ગ્રામ પંચાયતને ઘણી વાર જાણ કરી છે, પરંતુ કોઈ પણ અધિકારી આ મુદ્દા પર કાર્યવાહી કરવા આગળ આવ્યા નથી.
લોકોનો આક્રોશ
“અમે બહુવાર ફરિયાદ કરી છે, પરંતુ કોઈ સાંભળતું નથી. આ ગંદકી અને મચ્છરોના કારણે બાળકો અને વૃદ્ધો બીમાર પડી રહ્યા છે,” એમ સંગીતા નગરના એક રહીશે જણાવ્યું. અન્ય લોકોએ પણ પ્રશાસનની ઉપેક્ષાની નોંધ લઈને સવાલ ઊભો કર્યો છે: “જો કોઈ મોટો રોગચાળો ફાટે, તો જવાબદાર કોણ હશે?”
અધિકારીઓની ઉદાસીનતા
ગ્રામ પંચાયત અને તાલુકા પંચાયતના અધિકારીઓ આ મુદ્દા પર ગંભીરતાથી પગલાં લેવા બદલ લોકો દ્વારા ટીકાઓ થાય છે. સ્થાનિકોની માંગ છે કે, તાત્કાલિક ગટર લાઇનની સમારકામ કરવામાં આવે અને સ્વચ્છતા અભિયાન ચલાવીને આ વિસ્તારને સ્વસ્થ બનાવવામાં આવે.
નિઝર તાલુકા મથકે ગંદા પાણીની સમસ્યા લોકોના આરોગ્ય સાથે ખેલવા માંડી છે. જો પ્રશાસન તરફથી તાત્કાલિક કાર્યવાહી નહીં થાય, તો આ સમસ્યા વધુ ગંભીર રૂપ ધારણ કરી શકે છે.
