આહવા તાલુકાના ડોન ગામમાં આવેલ વિ. ખે. મો. સ. મં. લિ. દ્વારા ચાલતી સસ્તા અનાજના દુકાન સંચાલક રેશનકાર્ડ ધારકો પાસે વિનામૂલ્યે મળતી વસ્તુની પણ કિંમત વસૂલતા હોવાના આક્ષેપ સાથે ડાંગ જિલ્લા ભાજપા પાર્ટીનાં પૂર્વ પ્રમુખે જિલ્લા કલેકટરને લેખિત રજૂઆત કરી હતી.
ડાંગના આહવા તાલુકાના ડોન ગામના રહેવાસી અને ગ્રાહક સુરક્ષા વિભાગનાં સભ્ય તથા ડાંગ ભાજપા સંગઠનનાં પૂર્વ પાર્ટી પ્રમુખ રમેશભાઈ ચૌધરીએ ડોનમાં ચાલતી સસ્તા અનાજના દુકાન સંચાલક સામે આક્ષેપ કરતી લેખિત રજૂઆત જિલ્લા કલેકટરને કરી હતી. અહીં સંચાલક દ્વારા સસ્તા અનાજની દુકાન પર ઘઉં, ચોખા, બાજરી વગેરે વસ્તુઓ વિનામૂલ્યે મળતી હોય છે ત્યારે આ વિનામૂલ્યે મળતી વસ્તુઓ આપીને રાશનકાર્ડ ધારક પાસેથી નાણાંની વસૂલાત કરાય છે તેવા આક્ષેપો કર્યા હતા. ડોનમાં સસ્તા અનાજ દુકાનના 400થી વધુ કાર્ડ ધરાવતા પરિવાર રહે છે. દર મહિને એડવાન્સમાં આપવા પાત્ર રાશનની કિંમતના પૈસા પ્રત્યેક કાર્ડ ધારકો પાસેથી ઉઘરાવવામાં આવે છે અને અનાજ ભરી અપૂરતું અનાજ વિતરણ કરવામાં આવે છે. કાર્ડ ધારકો સસ્તા અનાજના સંચાલકને રજૂઆત કરવા પહોંચે કે સવાલ પૂછે તો તેમના દ્વારા ‘હું આગળ અધિકારીઓને જાણ કરીને એડવાન્સમાં પૈસા ઉઘરાણી કરીને અનાજ ભરું છું અને તમે આગળ ફરિયાદ કરશો તો હું ગાંધીનગર સુધી પહોંચી વળુ તેમ છું અને ગાંધીનગર પૈસા આપી ઓર્ડર લઈને આવું છું. મારું કોઈ બગાડી નહીં લે’ આ પ્રકારે ધમકીઓ આપી કાર્ડધારકોને ડરાવવાનો પ્રયત્ન કરાય છે. ડોનની સસ્તા અનાજની દુકાનની તપાસ કરી દુકાન સંચાલક સામે પણ કાયદેસરની કાર્યવાહી કરવામાં આવે તેવી ડાંગ જિલ્લા ભાજપાનાં પૂર્વ પ્રમુખ રમેશભાઈ ચૌધરી ઉર્ફ ડોને જિલ્લા કલેકટરને લેખિતમાં અરજી ફરિયાદ કરી હતી. વહીવટી તંત્ર કેવા પગલા ભરશે તે જોવું જ રહ્યું.
