ગુજરાત સહિત દેશભરમાં સતત ડિજિટલ અરેસ્ટની ઘટનાઓમાં વધારો નોંધાઈ રહ્યો છે. ટેક્નિકલ સર્વેલન્સથી આરોપીઓની શોધખોળ કરવામાં આવી રહી છે. આ વચ્ચે ગુજરાતમાં પ્રથમવાર ડિજિટલ અરેસ્ટના માસ્ટર માઈન્ડની ધરપકડ કરવા માટે સુરત પોલીસે સ્કેચનો સહારો લીધો છે. ડિજિટલ અરેસ્ટની ઘટનામાં આરોપીઓ સુધી પહોંચવા માટે પહેલીવાર સુરત પોલીસે એક્સપર્ટ પાસેથી સ્કેચ બનાવડાવ્યા છે. ડિજિટલ અરેસ્ટના ભોગ બનેલા ફરિયાદીઓના જણાવ્યા મુજબ બે માસ્ટર માઈન્ડના સ્કેચ તૈયાર કરવામાં આવ્યા છે. આ સ્કેચ હવે પોલીસ સોશિયલ મીડિયામાં મૂકશે, જેથી લોકો શિકાર બનતા બચી શકે અને આરોપીની જાણકારી પણ આપી શકે.
રાજ્યમાં પહેલીવાર ડિજિટલ અરેસ્ટના કેસમાં સ્કેચ બન્યા
ડિજિટલ અરેસ્ટની ઘટનાઓ હવે દિવસે ને દિવસે ગંભીર બનાતી જાય છે. ક્યારેક કસ્ટમ અધિકારી, ક્યારેક પોલીસ વિભાગના વડા તેમજ હવે ઉચ્ચતમ ન્યાયાલયના જજના નામે પણ ડિજિટલ અરેસ્ટની ઘટનાઓ બની રહી છે. જેમાં આરોપીઓ લાખો-કરોડો રૂપિયા ફરિયાદી પાસેથી બ્લેકમેલ કરી પડાવી રહ્યા છે. ટેલિફોન અને એકાઉન્ટના માધ્યમથી માત્ર એજન્ટ સુધી જ અત્યાર સુધી પોલીસ પહોંચી છે. હવે માસ્ટર માઈન્ડ સુધી પહોંચવા અને આ ઘટનામાં સામેલ લોકોની ઓળખ સામાન્ય પ્રજા સુધી પહોંચે, આ માટે સુરત પોલીસે સ્કેચનો સહારો લીધો છે. ગુજરાતમાં પ્રથમવાર ડિજિટલ અરેસ્ટની ઘટનામાં સુરત પોલીસ દ્વારા બે સ્કેચ જાહેર કરાયા છે.
ડિજિટલ એરેસ્ટ કરનારા લોકો સીન ક્રિએટ કરે છેઃ CP
આ સમગ્ર મામલે પોલીસ કમિશનર અનુપમસિંહ ગહેલોતે જણાવ્યું હતું કે, ડિજિટલ એરેસ્ટ કરનાર લોકો સીન ક્રિએટ કરે છે. પોલીસનો યુનિફોર્મ પહેરીને બેસે છે. ક્યારેક કસ્ટમના અધિકારી બનીને બેસે છે. અથવા તો જે તે રાજ્યના અધિકારીઓ બનીને ફરિયાદી સામે બેસે છે. આ લોકો ડિજિટલ અરેસ્ટ કરવા માટે આખું સેટઅપ ઊભું કરે છે. લોકોની અંદર ભયનો માહોલ ઉત્પન્ન કરે છે. જે લોકો બેસીને ડિજિટલ એરેસ્ટ ઓપરેટ કરે છે તે માટે અમે તપાસ કરી રહ્યા છે કે, તેમની ગેંગમાં કેટલા લોકો સામેલ છે. એમને પકડવા માટે અમારો પૂરો પ્રયાસ છે.
માસ્ટરમાઈન્ડનાં નામ કે સરનામાંની જાણકારી પોલીસ પાસે નથી
હાલ ડિજિટલ અરેસ્ટની ઘટનામાં સામેલ બે આરોપી કે જેમના પૂરા નામ કે સરનામાની જાણકારી પોલીસ પાસે નથી, તેના સ્કેચ બનાવવામાં આવ્યા છે. ફરિયાદી પાસેથી આરોપીના ચહેરાના હાવભાવ અંગેની જાણકારી મેળવીને સ્કેચ આર્ટિસ્ટ પાસે બે માસ્ટર માઈન્ડના સ્કેચ તૈયાર કરવામાં આવ્યા છે. હવે આ સ્કેચને પોલીસ પોતાના સોશિયલ મીડિયા હેન્ડલ પર મૂકશે, જેથી મોટી સંખ્યામાં લોકો આવા આરોપીઓને ઓળખતા થાય. આ સાથે જ આરોપીની વિગત કોઈ વ્યક્તિ પાસે હોય તો પોલીસને પણ આપી શકે.
ઉલ્લેખનીય છે કે, અત્યાર સુધીમાં જે રૂટિન ક્રાઈમની ઘટનાઓ બનતી હતી તેમાં આરોપીઓની શોધખોળ કરવા માટે સ્કેચ બનાવવામાં આવતા હતા, પરંતુ પ્રથમવાર ડિજિટલ અરેસ્ટની ઘટનામાં સ્કેચ જાહેર કરવામાં આવ્યા છે.
સ્કેચ સોશિયલ મીડિયામાં મૂકવામાં આવશે
તેઓએ વધુમાં જણાવ્યું હતું કે, મોટાભાગે લોકો મોબાઈલ ફોન અને એકાઉન્ટથી પકડાઇ જાય છે. પરંતુ આ ઓપરેટ કરનાર લોકો પકડાઈ જાય આ માટે અમને જે રીતે ફરિયાદીઓનાં નામ મળે છે, તેમને પૂછીને સ્કેચ પણ બનાવી રહ્યા છે. ડિજિટલ અરેસ્ટમાં સામેલ લોકોના સ્કેચ બનાવવામાં આવી રહ્યા છે. ફરિયાદીના જણાવ્યા મુજબ આ સ્કેચ બનાવવામાં આવી રહ્યા છે. આ લોકો બેસીને ડિજિટલ અરેસ્ટની ઘટનાને અંજામ આપે છે. અગાઉ ગંભીર ક્રાઇમની ઘટનામાં સ્કેચ બનાવીને આરોપીની ધરપકડ કરવામાં આવતી હતી. હાલ આ જ પ્રકારે અમે ડિજિટલ અરેસ્ટની ઘટનામાં સામેલ લોકોને શોધવા માટે સ્કેચ બનાવી રહ્યા છે. કારણ કે, આરોપીઓ આવી ઘટના એક જ જગ્યાએ નહીં, અનેક જગ્યાએ કરશે તો સહેલાઈથી પકડાઈ જશે.
